As jy al vantevore op die internet gekyk het na Google Earth of selfs Google se Street View funksie, dan sou jy seker soos ek ook verbaas gestaan het oor wat die sagteware jou alles bied. Eweskielik is die hele wêreld binne bereik vanuit jou rekenaar.

Die afgelope week terwyl ons besig was met ‘n nuwe webwerf funksie om ‘n perseel se roeteaanwysings te skep, het ek so vanuit die perseel verder uitbeweeg. Die buurt was later daar, toe die stad, toe die provinsie, later net Suid Afrika en op die ou einde die hele wêreld wat oorgebly het. Die aanwyser waar die perseel is, was nog op sy plek en ek het net weer my kop geskud oor hoe klein die mens eintlik is. Hoe nietig en kwesbaar.

Ek dink aan God se Woord waar Hy sê dat hy selfs weet van elke haar op ons kop. Dit laat my net weer besef hoe groot God regtig is. Daar is niks of niemand wat ons kan ruk uit Sy liefdevolle hand. Hy het alles onder beheer en weet van alles. Ons kan met vrymoedigheid na Hom gaan.

“Vader, hoe groot is U! Dankie dat U nooit slaap of sluimer nie. Dankie dat ek veilig is by U. Amen”

Johann de Jager (www.ministriesworldwide.net)

Twee of drie keer per week bespeur ek die nors mannetjies op my tafel. Hulle is gewoonlik alleen. Hulle houding stink, hulle mors my tyd en irriteer my grensloos. Hoekom hulle my tafel kies, weet ek nie, hoekom hulle nie dalk in groepe kom nie, weet ek nog minder. Pleks daarvan dat wanneer hy op my tafel beland, sy plig kom uitvoer of “what ever” hy ook al moet doen, drentel hy soos ‘n beer met ‘n seer tand. Of nee, hy lyk eerder soos ‘n oorgewig meerkat in die oggendson.