PRETORIA. – Mnr. Angus Buchan, Greytownse evangelis, wil voorbereidings tref om volgende jaar 200 000 mans met die Mighty Men-konferensie te ontvang.

Buchan, wat gister hier was ter voorbereiding van Saterdag se massabyeenkoms op Loftus Vers-feld, het op ’n byeenkoms van die Nasionale Persklub gesê hy wou nie nog ’n Mighty Men gehou het nie, maar daar sal nog een wees.

Soos vanjaar sal dit weer op die plaas naby Greytown gehou word. Die logistiek sal egter aansienlik verskil van vanjaar s’n toe 60 000 mans opgedaag het.

Buchan sê dit sal ’n opelug-byeenkoms wees, omdat daar g’n tent ter wêreld is wat plek het vir 200 000 mense nie.

Anders as vanjaar gaan hulle ook nie vir die mense kos gee nie. Elkeen moet sy eie kos saambring.

Om ’n herhaling te voorkom van die verkeersknope waarin mense vanjaar ure lank vasgesit het, gaan hulle die plaas aanstaande jaar al van die Maandag af oopstel vir die konferensie wat op Vrydag 8 Mei sal begin.

Oor Loftus vir Jesus, soos Saterdag se saamtrek bekend is, het hy gesê hy kom om vir mense te vertel God gee Suid-Afrika nog een kans.

“As ons dit nie vat nie, is ons in die moeilikheid. Niks minder nie as ’n herlewing wat van die Heilige Gees kom, sal dié land red.”

Buchan het gesê hy gaan sonde by die naam noem. Hy wil reguit praat, want hy is moeg daarvoor om “op eiers te loop” oor belangrike kwessies.

Hy is nie skaam vir die evangelie nie en beslis nie skaam vir Jesus nie.

Die geweldige belangstelling in sy boodskappe het hy bestempel as ’n wonderwerk. Tien jaar gelede wou hy ’n ontbytbyeenkoms vir mans reël. Hy het geadverteer en daar het net 14 opgedaag. Van hulle was vier van sy plaas af.

Dit wys vir hom die sukses is nie aan hom toe te skryf nie.

Op ’n vraag of hy ’n boodskap het vir vroue wat vaders se werk ook moet doen omdat dié dood is of hulle verlaat het, het Buchan gesê hulle moet Jesus Christus as hul man aanvaar. Hy sal vir hulle krag en rigting gee.

Hy het egter bygevoeg dat as mans hul rol speel soos hulle moet, behoort daar nie probleme vir weduwees of weeskinders te wees nie.

Hy self het ’n weeshuis op die plaas waar weeskinders versorg word.

~Volksblad 16/07/2008