KIMBERLEY. - Hy het 'n nuwe lewe gekry waarvoor hy die Here loof. Hy gee aan Hom alle eer vir sy wonderbaarlike herstel.

So gesels mnr. Hennie Coetzer (42), 'n bekende sakeman van die stad, nadat hy op 16 Junie in 'n fratsongeluk deur skrapnel van 'n koeël van 'n jaggeweer getref is toe hy en 'n goeie vriend gaan jag het.

Hy en 'n goeie vriend het op hul familieplaas sowat 50 km op die Boshof-Rietpan-pad gaan jag. Hennie het voor in die bakkie gesit.

Die vriend het op die dak van die bakkie aangelê om te skiet.

Die koeël het toe deur die dak van die bakkie gegaan en die skrapnel het Hennie in sy skedel getref.

Hy is dieselfde aand geopereer om die skrapnel uit sy skedel te verwyder. Hy is onder verdowing gehou en was in 'n kritieke toestand.

'n Gebedsaksie is vir hom begin.

Coetzer, wat reeds uit die hospitaal ontslaan is, en sy broer, Dougie, bedryf sedert 1987 Kimberley Woonwaens en NC Audio in die stad.

Hy het gister gesê hy herstel nou by die huis. Alles gaan goed en hy het geen rehabilitasie nodig nie.

"Ek het vandag 'n bietjie begin werk. Ek begin stadig die toue optel. Ek begin binnekort oefen en moet nou net rustig, kalm en geduldig wees."

Hy het gesê sy sig is nog beperk. Hy het halwe tonnelvisie en lees moeilik, maar alles gaan met die tyd herstel. Sy geheue is ook reg.

Daar is ook begin om sy medikasie minder te maak.

Hy kan nog nie self bestuur nie.

Hy het 'n nuwe lewe gekry en sien uit na die toekoms. Sy totale herstel sal tussen 6 en 18 maande duur.

Sy herstel is vir hom ongelooflik en hy wil die Here hiervoor loof en vir almal baie dankie vir hul ondersteuning sê.

Ondersteuning het van die hele Noord-Kaapse gemeenskap gekom. Dit was vir hom 'n ervaring van 'n leeftyd. Hy het nou besef hoeveel wonderlike en goeie mense daar in die Noord-Kaap is.

In sulke tye sien 'n mens wie is jou werklike vriende en hy het al sy vingers hiervoor nodig, maar sal ook sy skoene vir sy tone moet uittrek om hulle almal te tel - en hy sal nog ander mense se hande en voete ook moet leen hiervoor. Dit verskil van die uitdrukking dat 'n mens jou vriende op een hand kan tel. Hy sê hy is nie jammer oor wat gebeur het nie. Hy is bly oor waar hy nou is.

Hannatjie van der Merwe - Volksblad - Jul 15 2009