WELKOM. - "Al die eer en lof kom die Here toe, want dit is net deur Sy genade dat ons seun nog leef. Ons kan sien hoe almal se gebede werk en hy by die dag sterker word."

Só het mnr. Lafras Fritz (sr.) gister by die Bloemfontein-Medi-Clinic gesê waar hy en sy vrou, Chantelle, by hul seun, Lafras (15), waak.

Lafras (jr.), jong motorfietsryer van Welkom, het Maandag in 'n motorfietsren op die Phakisa-renbaan buite die stad geval en is deur 'n ander renjaer getref toe hy opstaan.

Fritz sê sy seun is steeds onder verdowing en aan hart- en longmasjiene gekoppel.

Sy toestand is kritiek maar stabiel. Hy kan hulle beslis hoor en reageer deur sy kop te knik of te skud as hulle met hom praat.

"Ons wil aan almal wat ons ondersteun en vir hom bid, baie, baie dankie sê. Hy word al hoe sterker en ons weet dat dit net deur God se genade en almal se gebede moontlik is."

Hy sê die noodsaaklikste operasies is op Lafras uitgevoer, onder meer om sy aorta en van sy ingewande wat geskeur is te heg. Daar lê egter nog talle operasies voor as hy sterk genoeg daarvoor is.

Hy is Maandagaand per lugambulans van Welkom na die Bloemfontein-Medi-Clinic gevlieg nadat dr. André Loubser, trauma-spesialis, hom in Welkom genoegsaam gestabiliseer het om hom na Bloemfontein te kon oorplaas.

Lafras, wat verlede jaar hoofseun aan die Laerskool Naudéville in Welkom was, se aorta en ander ingewande is geskeur, sy hart en een long is beseer, hy het kopbeserings, asook verskeie beenbreuke soos sy arm, een been en bekken.

Intussen is verskeie gebedsgroepe vir dié gewilde seun en veelsydige sportman begin. Een van die gebedsgroepe is op Facebook waar familievriende gereeld nuwe inligting oor hom plaas en vra dat vir hom gebid word.

Volgens een van die inskrywings kan God gedank word dat Lafras die vlug na Bloemfontein oorleef het, omdat dit 'n groot bron tot kommer vir sy dokter was.

Lafras is vanjaar 'n gr. 8-leerling aan die Goudveld-Hoërskool in Welkom.

- Volksblad