Foto : Marlene JordaanKROONSTAD. – Toe een van sy aanvallers hom met ’n kettie en tweeduim-ysterghoen skiet, en sy baadjie hom beskerm, het die aanvaller vir hom gesê: “Sien jy, die Modimo (God) keer vir my.”

Was dit nie vir God se ingryping op die dag wat hy en sy vrou op hul plaas by Koppies aangeval is nie, het hy nie vandag geleef nie.

Só het mnr. Louis Boshoff (66) gister buite die hof aan Volksblad gesê nadat die mans wat hom en sy vrou, Elsabé (59), in 2009 op hul plaas Viljoenslaagte aangeval en hom met ’n .38-rewolwer in die rug geskiet het, skuld beken het en tronk toe gestuur is.

“Ek het geen vrees gehad nie. Dit het van Bo gekom,” vertel hy.

Sy milt en die helfte van sy pankreas moes ná die aanval verwyder word.

Die mediese uitgawes beloop al R600000.

Die aanvallers het Bella, sy Duitse pointer-hond, ook met die kettie en ghoen geskiet. Sy het dit oorleef, maar is maande later op die plaas vergiftig.

Hy glo God het ’n paar wonderwerke laat gebeur daardie dag. Eerstens het sy buurman nie dadelik geantwoord toe hy hom gebel het nie.

“Hy het sy vuurwapen by hom gehad en ’n mens weet nie wat sou gebeur het as hy gewapen daar aangekom het nie.

“Toe die aanvaller die skoot afvuur, het ek nét op die trappie geklim.

“Hy skiet my toe tussen die ribbes deur die milt en voor uit,” vertel hy.

Sy buurman was net drie minute se ry van die plaas af en was blitsig daar om te help.

Haar man het self na die buurman se bakkie toe gekruip. Hy het nog ’n lap vir die sitplek gesoek omdat hy dit nie wou vuilsmeer met bloed nie, vertel mev. Boshoff.

Op pad hospitaal toe het hy genavigeer en die noodflikkerligte aangesit, vertel sy.

Toe hy later sy baadjie uittrek, het die koeël op die grond geval.

Hy het ook eers vir die dokters gebid voordat hulle hom geopereer het.

Hy vertel hoe, terwyl hy in die teater was, hy afgekyk het op die groen hoedjies van die dokters, die groot teaterligte en sy eie liggaam.

“God het dit vir my bevestig toe die narkotiseur my later besoek het en vir my gesê het my bloeddruk was in ’n stadium tydens die operasie 28/10 en dat ek dood moes gewees het.”

Hy was vir 40 dae en 40 nagte in die hospitaal.

Marlene Jordaan - Volksblad