Baie welkom by ons webwerf wat ingestel is om jou te ontmoet in die markplein en sommer net daar te wees vir jou.

Om Jesus op aarde te verteenwoordig is nie net 'n fantastiese voorreg vir elke Christen nie, dis ook 'n groot verantwoordelikheid. Om geestelik in die "markplein" of sekulêre wêreld te oorleef is nie so maklik nie en dis waar ons roeping lê. Die samestelling van ons pfJ's is dan gemik om mense elke oggend te ontmoet by die werkplek en te bedien met 'n samestelling van geestelike materiaal wat onsself of skryf (soos die Here op ons harte lê) of wat ons verkry van medewerkers, instansies of skrywers regoor die wêreld.

Soms het mense net die behoefte om hulle hart uit te stort, met iemand te praat of om voorbidding te vra. Gelukkig is 'n groot aantal mense persoonlik aan ons bekend en leer ons elke dag ook nuwe mense beter ken en wanneer ons knieë soms swik, kan ek persoonlik getuig hoe daar al 'n "geestelike laer" rondom ons getrek en ons deur hulle gedra is.

Is dit nie waaroor dit gaan nie? Om daar vir mekaar te wees, sonder pretensies en voorwaardes om God te dien nie?

Om daarna te streef dat Jesus ons lewens so sal verander, dat ons eerstens in onsself sal sterf en tweedens om in Sy volheid en in Sy krag te kan wandel en Sy koningkryk op aarde uit te bou nie?

Kom ons streef daarna dat ons lewens 'n heilige offer voor Jesus sal wees, welgevallig en aanneemlik vir God. Kom ons raak vernuwe in ons denke deur die werking van die Heilige Gees.

Kom ons dien die Here en maak 'n verskil vir Sy koningkryk.

Johann & Zelda de Jager

Oorweeg asb die volgende:

• Dra by tot die inhoud van hierdie webwerf.
• Raak betrokke op jou gebied van kundigheid
• Bid vir die werk van die Here
• Stel hierdie webwerf bekend aan jou Boeties en Sussies in Jesus.

• As jy nog nie vir Jesus ken nie, Hom 'n kans te gee....

Sommer net so ietsie anders:

Ons hang nie enige spesifieke kerk se leerstellings aan nie, ons is bloot passievol oor Jesus en beskou die Bybel as ons basis van ons geloof. Waar Jesus in Gees en Waarheid aanbid word - daar sal ons tuis wees.